Оқиға ағымдағы жылдың 6 ақпанында Қазақстан станциясынан (Ақсай қ.) 3-4 шақырым жерде болған, деп хабарлайды kazlenta.kz.
38 жастағы Аиза Жолдаспаева жұбайы Нұрболмен бірге «Орал-Алматы» бағытындағы жолаушылар пойызымен Ақтөбеге жол тартады. Алайда, пойыз Қазақстан станциясынан өтіп бара жатқанда, жүктіліктің 8 айында болған 38 жастағы жолаушы әйел кенеттен ауырып, қатты қан кетті.
Пойыз шұғыл тежеу жасап, тоқтады, машинист-диспетчер рация арқылы жедел жәрдем шақырды. Алайда, оқиға орнына бірінші болып Қазақстан станциясындағы Желілік полиция бөлімшесінің бастығы Мұхатай Аяпов келді. Пойыз жазық далада болғандықтан, жедел жәрдем оған жете алмаған. Мұхатай Аяпов әйелді қар құрсауынан көтеріп шығарып, оны көлігіне отырғызып, Бөрлі аудандық ауруханасына алып келді. Бірден әйелге ота жасалып, дүниеге қыз бала келді.
Полиция подполковнигі Мұхатай Аяпов қатты уайымдап, уақыттың өте тығыз екендігін өте жақсы түсінгенiн айтады.
Босанған әйелдің жұбайы Нұрбол Жолдасбаев қазіргі уақытта келіншегі мен қызының жағдайлары қалыпты екендігін жеткізді. Ол сондай-ақ көлік полицейлеріне үлкен алғысын білдірдi.