Алматыда Наталья Кузнецова атындағы гимнастика мектебінің дәстүрлі ашық біріншілігі өз мәресіне жетті.
Жарысқа жекелей сында 750 спортшы және әлемнің 7 елінен, 31 командадан 14 топтық жаттығу бойынша 2012 жылы туған және одан кіші жастағы 214 қатысушы қатысты.
«Турнирдің негізгі контингенті 4-6 жастағы, жаңадан бастаған гимнасшылардан тұрады. Олар үшін арнайы санаттар ойластырылды. Нәтижесінде, 2012 жылы туған және одан кіші жастағы «С» және «С2» санатындағы балалар алтын медальдармен, сертификаттармен және естелік сыйлықтармен марапатталды. Біз мұны балаларды ынталандыру үшін жасаймыз. Сонымен қатар осы жастағы «А» және «В» санаттарындағы тәжірибелі гимнасшылар да жүлдегерлер қатарынан табылды», - дейді турнирдің бас хатшысы, Н.Кузнецова мектебінің аға жаттықтырушы Виктория Горбунова.
Ұйымдастыру комитетіні хабарлағандай, жарыс 5 санатқа бөлініп, өзіндік ережелері мен жүлделі орындары бекітілген. Турнирді ұйымдастыру комитеті өкілдерінің сөзіне сүйенсек, бұл жүйе қатысушылардың тұлғалық мүмкіндігін ашып қана қоймай, сонымен қатар білікті төрешілердің де жаңа тобын өсіруге мүмкіндік береді. Мәселен, жас мамандар қатысушылардың кіші топтарын бағалап, күрделі композициялар бойынша тәжірибе жинайды.