Қоғамдық көліктегі оқыс оқиғалар мен құқыққа қарсы әрекеттердің алдын алу мақсатында ІІМ-нің нұсқауымен республика көлемінде “Тасымалдаушы” жедел-профилактикалық іс-шарасы өткізіліп жатыр, – деп хабарлайды kazlenta.kz тілшісі Polisia.kz сайтына сілтеме жасап.
Аталған шараның бір күнінде шымкенттік полицейлер қоғамдық көлікте заң бұзушылыққа жол берген 13 жайтты анықтады.
Оның ішінде қоғамдық орындарда алкогольдік ішімдік iшкен немесе масаң күйде жүрген 6 тұлға, тыйым салынған орындарда темекі шеккен 6 азамат және қоғамдық орындарда тиіскені үшін бір адам әкімшілік жауапкершілікке тартылды.
Айта кетейік, профилактикалық жұмысқа 600-ден астам тәртіп сақшысы жұмылдырылды. Қоғамдық көлік ішіндегі тәртіп пен заңдылықты сақтау және жүргізушілер мен жолаушылардың қауіпсіздігін қамтамасыз етуге бағытталған шара 11-15 қаңтар аралығында жалғасады.
Полицейлер автобус ішінде қандай да заң бұзушылықтың құрбаны немесе куәсі болсаңыз, бірден “102” арнасына хабарлауға шақырады.