Анна Данилина германиялық Анна-Лена Фридзаммен бірге финалда жарыстың 2-ракеткалары, корт иелері Катажина Кава – Алисия Росольскамен шеберлік байқасты. Бірінші партия барысында К.Кава мен А.Росольска 3:1 есебімен алға шыққанымен, қазақстандық-германиялық жұп таразы басын аудара білді – 6:4. Екінші сетте есеп 4:5 болған кезде де Данилина мен Фридзам брейк жасай алды – 5:5. Бірақ қарсыластары қайыра брейк жасап, сетті өз есептеріне жазды – 7:5.Супер тай-брейкте қазақстандық-германиялық жұп 8:0 есебімен алға кетті.
Бұдан кейін К.Кава мен А.Росольска есепті қысқартқанымен, Данилина мен Фридзам мүмкіндігін жібермеді – 10:5.Екі сағатқа жуық уақытқа созылған тартысты матчта қазақстандық-германиялық дуэт 12 брейк-пойнттың бесеуін пайдалана білді. Польшалық жұп та 5 брейкпен (7 брейк-пойнт) көзге түсті. Осылайша, Анна Данилина өз спорт жолында жұптық сында үшінші рет WTA жарысының чемпионы атанды. Өткен жылы Гданьск (Польша) қаласында үздік шықса, биыл жыл басында Сиднейде WTA-500 турнирінің жеңімпазы болған еді. Еске сала кетейік, бұдан бұрын қазақстандық жас теннисшілердің Өзбекстанда өткен турнирдің жеңімпазы атанғанын жазған болатынбыз.