2022 жылдың қаңтар–қараша айларында кәсіптік, ғылыми және техникалық қызмет саласында негізгі капиталға салынған инвестиция 45,5 млрд теңгені құрады, бұл бір жыл бұрынғыдан 14,7% аз. Нақты көлем индексіне (81,1%) қарасақ, нақты мәнде төмендеу 18,9%-ды құрады, деп хабарлайды finprom.kz-ке сілтеме жасаған kazlenta.kz
Өңірлер бойынша кәсіптік, ғылыми және техникалық қызмет саласындағы күрделі салымдардың ең көп көлемі Астанаға тиесілі: 10,3 млрд теңге, бір жылда құндық мәнде 1,8% көбейді.
Алматы екінші орында: 8,9 млрд теңге, бір жыл бұрынғы сәйкес кезеңімен салыстырғанда 10,1% көп. Үздік үштікті Қызылорда облысы түйіндеді: 6 млрд теңге, жылдық өсім — 13,2%. Үздік үш өңірге елдегі барлық инвестицияның 55,4%-ы тиесілі.
Ең аз инвестиция Жетісу өңірінде: небәрі 158,9 млн теңге. Одан бөлек Павлодар мен Ақмола облыстарында да аз.
Салаға салынған инвестиция көлемінің барлығы дерлік кәсіпорындардың меншікті қаражаты есебінен қамтамасыз етілді: 91,2% немесе 41,5 млрд теңге. Көрсеткіш бір жылда 13,7% азайған.
Республикалық бюджеттен бөлінген қаражат 1,7 млрд теңгені (жылдық өсім — 2,9 есе), жергілікті бюджеттерден — 397,6 млн теңгені (7,8% көбейген) құрады. Банк несиелері есебінен салынған инвестиция бірден 28,2 есе өсіп, 1,2 млрд теңгеге жетсе, банктік емес қарыз қаражат есебінен салынған инвестиция керісінше 83% азайып 720,2 млн теңге болды.
2023 жылы қолданбалы ғылымды қаржыландыруды кезең-кезеңімен, оның ішінде бизнестің ғылыми зерттеулерді қоса қаржыландыру есебінен ұлғайту көзделген, деп хабарлайды ҚР премьер-министрінің ресми ресурсы.
Биыл олар жетекші университеттер мен ірі кәсіпорындардың жанынан мамандандырылған инженерлік орталықтарды, ғылыми-технологиялық парктерді дамытуды жоспарлап отыр. Ғылыми зерттеулердің, жаңа технологияларды әзірлеудің және трансфертінің экономикалық тиімділігін арттыру нормаларын көздейтін «Ғылыми-техникалық саясат туралы» жаңа заң әзірленбек.