СҚО әкімі Айдарбек Сапаров 2-ші Жылу электр орталығында жаңа мұржаның құрылысымен танысты, деп хабарлайды kazlenta.kz.
«2-ші Жылу электр орталығында болып, жаңа мұржаның құрылысы мен жөндеу жұмыстарын бақыладым. Келесі жылыту маусымына дайындық бойынша жедел кеңес өткіздім», — деп жазды облыс әкімі Айдарбек Сапаров әлеуметтік желідегі парақшасында.
Биыл кәсіпорын мұржа салуға, қазандықтарды жөндеуге, сондай-ақ электр және жылу желілерін жаңартуға 12 млрд теңге бөлді.
Айдарбек Сапаров облыс әкімінің орынбасары, қала әкімі және тұрғын үй-коммуналдық шаруашылығы басқармасының басшысы үшін жұмыстың кестеге сай жүріп жатқанын әрдайым тексеру қажет деп атап өтті.
«Бұл мәселе менің жеке бақылауымда. Бірлескен іс-қимылдың арқасында жұмыстардың дер кезінде аяқталуын қамтамасыз ете аламыз», — деді өңір басшысы.