Жедел-іздестіру іс-шаралары барысында Түркістан облысы Полиция департаментінің қызметкерлері оңтүстік өңірдің тұрғындары жасаған бірқатар интернет-алаяқтықтарды ашты, деп хабарлайды kazlenta.kz Polisia.kz сайтына сілтеме жасап.
Мәселен, Шымкент қаласының тұрғыны интернет-алаяқтықты тұрақты табыс көзіне айналдырып, «InDriver» қосымшасы арқылы жолаушыларды тасымалдауға тапсырыс беру сылтауымен алдау арқылы жүргізушілердің жеке деректерін – жеке куәліктерін, тексеру үшін фотосуреттерді, сондай-ақ банк шоттарының деректерін алған. Содан кейін күдікті жәбірленушілердің атынан несие ресімдеген. Қазіргі уақытта оның осындай тоғыз фактіге қатысы бары белгілі болды.
Облыс полицейлері тағы бір алаяқты ұстады. Ол өзін спутниктік теледидар қызметкері ретінде таныстыра отырып, азаматтардың жеке деректерін алып, шағын несие беретін ұйымдарда қарыз ресімдеді. Алаяқ осындай 30-дан астам фактілерге қатысты. Күдіктілер уақытша ұстау изоляторына қамалды. Олардың басқа қылмыстарға қатысын анықтауға бағытталған іс-шаралар кешені жүргізілуде.
Ақпараттық технологияларды өміріміздің барлық аспектілеріне кеңінен енгізу киберқылмыстың, әсіресе интернеттегі алаяқтықтың өсуіне әсер етті. Жыл басынан бері осындай 1,5 мың қылмыс тіркелген.