"Ақорда" резиденциясында төрт елдің төтенше және өкілетті елшілерінің мемлекет басшысы Қасым-Жомарт Тоқаевқа сенім грамоталарын тапсыру рәсімі өтті, деп хабарлайды Ақорда.
Президентке сенім грамоталарын Швеция Корольдігінің елшісі Ева Ульрика Пулано, Грузияның елшісі Николоз Лалиашвили, Мьянма Одағы Республикасының елшісі Лвин У және Кипр Республикасының елшісі Кипрос Йоргаллис тапсырған. Өз кезегінде Қасым-Жомарт Тоқаев елшілерді Қазақстандағы дипломатиялық миссиясының ресми түрде басталуымен құттықтап, екіжақты байланыстарды одан әрі нығайту жұмыстарына табыс тілеген.
Сондай-ақ мемлекет басшысы Қазақстанның достық және өзара тиімді қарым-қатынастарды нығайтуға бағытталған бейбіт әрі ашық сыртқы саясат жүргізіп отырғанын айтқан. Президент дипломаттардың игі миссияларын орындауы кезінде Қазақстан үкіметі тарапынан жан-жақты қолдау көрсетілетінін де атап өткен. Рәсім соңында Қасым-Жомарт Тоқаев елшілерге табыс тілеп, олардың мемлекеттерінің басшыларына ізгі тілегі мен сәлемін жолдаған.
25-01-2023, 09:28
Президент бірқатар мемлекеттің елшілерінен сенім грамоталарын қабылдады
Егер мәтінде қате байқасаңыз, оны таңдап, Ctrl+Enter пернелерін басыңыз