Мемлекет басшысы Қасым-Жомарт Тоқаев Ішкі істер министрі Марат Ахметжановты қабылдады. Ведомство басшысы президентке биылғы 10 айдағы криминогендік жағдай туралы есеп берді, деп хабарлайды Ақорда.
Министрдің мәліметі бойынша, елімізде кісі өлтіру, зорлық-зомбылық, тонау, ұрлық, мал ұрлығы, сондай-ақ бұрын сотталғандар тарапынан, мас күйінде және отбасылық-тұрмыстық салада жасалған қылмыстар азайған. Марат Ахметжанов мемлекет басшысына құқық бұзушылықтың алдын алу жұмыстары, атап айтқанда, отбасылық-тұрмыстық салада зорлық-зомбылық жасағаны үшін жауапкершілікті күшейту жөніндегі кешенді шаралар әзірлеу туралы да мәлімет берген. Сонымен қатар ұйымдасқан қылмыстың себептері мен қаржыландыру көздерін жоюға баса мән бере отырып, оларға қарсы күрес тәсілдерінің өзгергені жөнінде баяндаған.
Министрдің айтуынша, бопсалаумен, адам саудасымен, қару-жарақты, есірткіні заңсыз сатумен және басқа да қылмыстармен айналысқан 33 ұйымдасқан қылмыстық топтың жолы кесілген. Одан бөлек, полицейлер заңсыз айналымдағы 12 тоннаға жуық есірткіні, соның ішінде оның 212 келі синтетикалық түрлерін тәркілеген. 36 есірткі зертханасы мен 43 есірткі каналы жойылған, есірткілерді жарнамалайтын 1900 сайт бұғатталған. Марат Ахметжановтың сөзінше, қазіргі таңда өзі басқаратын ведомство нашақорлыққа және есірткі бизнесіне қарсы үш жылға арналған кешенді жоспар әзірлеп жатыр. Сонымен қатар министр "Адам саудасына қарсы іс-қимыл туралы" жеке заң әзірленіп жатқанын да атап өтті. Кездесу соңында мемлекет басшысы Ішкі істер министріне елімізде азаматтардың қауіпсіздігін және құқықтық тәртіпті қамтамасыз етуге бағытталған бірқатар нақты тапсырма берді.
11-11-2022, 10:09
ІІМ Марат Ахметжанов Президент алдында есеп берді
Егер мәтінде қате байқасаңыз, оны таңдап, Ctrl+Enter пернелерін басыңыз