Елімізде жастардың жұмыс іздеуіне қолайлы «Білім» жүйесі іске қосылады. Жаңа жүйе 2019 жылдың қыркүйек айынан бастап өз жұмысын бастайды.
Алматы әкімдігі арнайы тестілеуден кейін оңтүстік астананың барлық колледждерінде білім беру процесін автоматтандыру жүйесін енгізбек.
Алматы қалалық білім басқармасының айтуынша, «Білім» жүйесі колледж түлектерінің жұмысқа орналасуына жол ашады. Алдағы уақытта жастар аталған жүйе арқылы өздеріне ұнаған жұмысқа орналасуына мүмкіндік алады.
«Білім» цифрлық платформасы Қазақстан бойынша 25 мыңнан астам кәсіпкер тіркелген «Параграф» ақпараттық жүйесінің бір бөлігі саналады. Оларды әлеуетті жұмыс берушілер қатарына жатқызуға болады.
Аталмыш жүйе арқасында колледж студенттері түйіндемені тікелей жұмыс берушінің кадр бөліміне жібере алады. Ал жұмыс беруші тарап жүйеден студенттің тек түйіндемесін ғана емес, оның қалай оқығанын, қандай бағалар алғанын және оқытушы мен студент арасындағы байланыс қандай екенін біле алады.
Сонымен қатар жұмыс берушілер студенттерді білім алып жүрген уақытта алдын-ала үміткер ретінде таңдап, тағылымдамаға шақыра алады. Мұндай тәсіл колледж түлектерінің жұмысқа орналасуына үлкен мүмкіндік береді.
«Білім» жүйесі оңтүстік астананың барлық колледждерінде қыркүйек айынан бастап жұмыс істей бастайды. Әзірге жүйе толықтай тексеру кезеңінен өтіп жатыр.