Шығыс Қазақстанда ауа температурасының көтерілуі таулардың беткейлерінде қар жамылғысының тұрақсыз жағдайына алып келді, бұл қар көшкінінің өздігінен түсуіне қауіп төндіреді, деп хабарлайды kazlenta.kz тілшісі ШҚО ТЖД сілтеме жасап.
Қауіпсіздік мақсатында ШҚО ТЖД құтқарушылары мен "Қазселденқорғау" ШҚ филиалының мамандары "Өскемен-Таулы Үлбі– Северное" автожолының учаскесінде профилактикалық түсірулер жүргізді.
750 текше метр қар түсірілді. Автожол автокөлік қозғалысы үшін жабылды, қар тазалау жұмыстары жүргізілді.
"Наурыз айында қар көшкіні тәуліктің кез келген уақытында болуы мүмкін. Қар ауыр болады және осы кезеңде қар көшкіні оңай және тез түсіп кетеді.Өңірдегі қауіпсіздік мақсатында наурыз айының басынан бастап 19650 текше метр қар түсірілді. Халыққа алыс жолға және тауға шықпауға кеңес береміз", - деп атап өтті "Қазселденқорғау" ШҚ филиалының басшысы Советбек Станбеков.