Солтүстік Қазақстан облысында былтырғы жол-құрылыс мауысымында салынып, жөнделген 163 нысан тексеріліп, 190 кемшілік анықталды, деп хабарлайды kazlenta.kz тілшісі Қазақпаратқа сілтеме жасап.
СҚО-да былтыр 700 км жол жөнделді. Бұл - республикалық, облыстық, аудандық маңызы бар және ауылішілік жолдар.
Қыруар қаржы жұмсалған жұмыстың нормативті-техникалық талапқа сай келуін тексеру мақсатында «Жол активтері сапасының ұлттық орталығы» РМК Солтүстік Қазақстан облыстық филиалының өкілдері 163 нысанды таңдап алып, тексерген. Сондай-ақ жол-құрылыс материалдарының 1600-ге жуық сынамасы алынды. Жолдар бойынша - 190, құрылыс материалдары бойынша 597 олқылық анықталды.
«Облыстық маңыздағы жолдарға келер болсақ, 12 нысан назарға алынып, 333 сынама тексерілді. Оның 121-і, яғни 85 % талапқа сәйкес келмеді. Мердігерлерге жіберілген қателіктерді түзету міндеті қойылды. Нәтижесінде 107 сынама бойынша кемшілік түзетілді. Материал құрамында судың көп болуы, тығыздық коэффициенті, қысу кезінде беріктік шегі параметрлерінің сай болмауы жиі кездеседі. Аудандық маңыздағы, ауылішілік жолдарда асфальт-бетон жабындысы жарылып кеткен, ойықтар бар, кейбірінің паспорты болмады», - дейді «Жол активтері сапасының ұлттық орталығы» РМК Солтүстік Қазақстан облыстық филиалының директоры Жолдыбай Тентеков.
Орталық директорының айтуынша, кемшіліктердің басым бөлігі түзетілді, қалғанын күн жылынысымен мердігерлер жөнге келтірмек. Мәселен бір жыл ішінде анықталған 190 кемшіліктің 141-і бойынша тиісті жұмыс жүргізілді, қалған 49-ы назарға алынған.