Жамбылда жалған нөмірмен жол ережесін бұзып жүрген көлік жүргізушісі ұсталды, – деп хабарлайды kazlenta.kz тілшісі Polisia.kz сайтына сілтеме жасап.
Әкімшілік полиция қызметкерлері алтын түстес Toyota Camry автокөлігін анықтады, оның жүргізушісі бірнеше ай ішінде 2 миллион 457 мың 350 теңгеге 54 мәрте жылдамдық режимін бұзған.
Полицейлер 31 жастағы жүргізушіні бейнебақылау камералары арқылы әшкереледі. Оған көлiк құралына көрiнеу жалған немесе қолдан жасалған мемлекеттiк тiркеу нөмiрiн орнатқаны және басқарғаны үшін ҚР ӘҚБтК-нің 590-бабының 3 және 4-бөліктері бойынша әкімшілік хаттамалар толтырылды.
Ол үшін жүргізушіге тағы 27 690 теңге айыппұл салынды және сот шешімімен 1 жылға көлік құралын басқару құқығынан айырылды, сондай-ақ 1 тәулікке әкімшілік қамауға алынды.
Құқық бұзушының автокөлігі мамандандырылған айып тұрағына қойылды.
Айта кету керек, автокөліктің тіркелген өз нөмірінде жол қозғалысы ережелерін бұзу дерегі жоқ.
2023 жылдың 12 айында Жамбыл облысында 22500-ден астам жүргізуші белгіленген қозғалыс жылдамдығынан асып кеткені үшін әкімшілік жауапкершілікке тартылды.