ҚР Сыртқы істер министрлігінде Түркі мемлекеттері ұйымының сыртқы істер миинстрлері кеңесінің жабық отырысы өтіп жатыр, деп хабарлайды kazlenta.kz тілшісі Kazinform сайтына сілтеме жасап.
Сыртқы істер министрлері кеңесінің отырысына ТМҰ-ға мүше мелекеттердің, байқаушы елдердің сыртқы істер министрлері және халықаралық ұйым өкілдері қатысуда.
Отырыстың ашылуында ҚР Сыртқы істер министрі Мұрат Нұртілеу түркиялық әріптесі Хакан Фиданды Түркия Республикасының 100 жылдығымен құттықтады.
Бауырлас түрік еліне үйлесім, прогресс және одан әрі өркендеу тіледі.
«ТМҰ мерейтойлық оныншы саммиті және министрлер кеңесінің Қазақстанда – түркі ата-бабаларының жерінде өтуінің символдық мәні бар. 1993 жылы шілдеде Түркітілдес мемлекеттердің алғашқы саммиті Қазақстанда өткен еді. Мемлекеттеріміздің басшылары бүгін Астана актісі мен Декларациясын қабылдап, ұйымымыз үшін жаңа тарауын ашу үшін жиналып отыр. Бұл көрнекті құжаттар біздің көшбасшыларымыздың түркі халықтарының ортақ тарихына, тіліне, мәдениетіне, дәстүрлері мен құндылықтарына негізделген жарқын болашаққа деген бірлескен көзқарасын айғақтайды», - деді Қазақстанның Сыртқы істер министрі.
Мұрат Нұртілеудің алғысөзінен кейін делегация басшылары алфавит тәртібінде мәлімдеме жасайды және ұйымға мүше мемлекеттер мен бақылаушылар атынан қатысатын әрбір спикерге сөз сөйлеу үшін 7 минут беріледі.
Түркі ынтымақтастығы ұйымдарының басшылары мен ақсақалдар кеңесінің төрағасына 3 минут уақыт беріледі.
Отырыс сағат 10.00-де Түркі мемлекеттері ұйымының тиісті құжаттары мен шешімдерін қабылдаумен аяқталады деп жоспарланған.
Осыдан кейін Түркі мемлекеттері ұйымының саммиті бағдарламасына сәйкес министрлер Ақордаға барады.
Айта кетейік, 2021 жылғы 12 қарашада Ыстанбұлда өткен Түркі тілдес елдердің ынтымақтастық кеңесі саммитінде Түркі кеңесінің атауы Түркі мемлекеттерінің ұйымы болып өзгертілді.
Бүгін елордада Түркі мемлекеттері ұйымының (ТМҰ) мерейтойлық Х саммиті өтеді.
Бұл жиынға Түркі мемлекеттері ұйымына мүше Әзербайжан, Қырғызстан, Түркия, Өзбекстан президенттері, сондай-ақ ТМҰ-дағы бақылаушы мемлекеттер – Мажарстан мен Түрікменстан басшылары қатысады.
Саммит «Түркі дәуірі» ұранымен өтетін жоғары деңгейдегі пікірталастар үшін маңызды алаң болады.