Қазақстанның авиациялық әкімшілігінің мамандары Әзірбайжанның астанасында ұйымдастырылған тоғызыншы өңірлік авиациялық қауіпсіздік және рәсімдеу тәртібін жеңілдету семинарына қатысты, деп хабарлайды kazlenta.kz.
Аталған іс-шараны ИКАО-ның Еуропалық/Солтүстік атлантикалық бюросы Таяу Шығыс – авиациялық қауіпсіздік жөніндегі бірлескен бағдарламасымен бірлесіп өткізгенін айта кеткен орынды. Семинар рәсімдеуді жеңілдету блогынан және әуежайдың бақыланбайтын аймағындағы қауіпсіздік шараларын күшейтуге байланысты семинар-практикумнан тұрды.
Семинарға ИКАО халықаралық азаматтық авиация ұйымының Қазақстаннан, Әзірбайжаннан, Қырғызстаннан, Өзбекстаннан, Тәжікстаннан, Беларусь, Ирактан, Чехиядан, Албаниядан, Сауд Арабиясы мен Солтүстік Македониядан келген өкілдері қатысты.
Күн тәртібінде рәсімдеу тәртібін жеңілдету, әуе тасымалы кезіндегі рәсімдеуді оңтайландыру бойынша ұлттық бағдарлама мен әуежай бағдарламаларын әзірлеу саласындағы халықаралық тетіктерге қатысты мәселелер талқыланды. Сондай-ақ семинарда аталған мәселеге байланысты қойылатын талаптар туралы презентациялар ұсынылды. Өз кезегінде «Қазақстанның авиациялық әкімшілігі» АҚ-ның Рәсімдеуді жеңілдету, жолаушылар мен жүктерге қызмет көрсету департаментінің өкілдері баяндама жасады.
Естеріңізге сала кетейік, әуежайдың бақыланбайтын аймағының қауіпсіздігін қамтамасыз ету шараларына арналған ИКАО-ның семинар-практикумы ұйымның 17-қосымшасын енгізуге қатысатын мемлекеттер мен авиациялық қауіпсіздік жөніндегі сарапшыларға арналған. Оның барысында әуежайдың периметрін қорғау мәселелері, физикалық қорғаныс құралдары, қауіп деңгейін төмендету шаралары, қауіпсіздік мәдениеті және Әзірбайжан Республикасы әуежайларының бақыланбайтын аймақтарында авиациялық қауіпсіздікті қамтамасыз ету шаралары қарастырылды.
Осы семинарда Гейдар Әлиев халықаралық әуежайның бақыланбайтын аймағында тәжірибелік оқыту өткізілгенін айта кетейік. ИКАО-ның бұл бастамасы авиациялық қауіпсіздікті күшейтіп, одан әрі жетілдіруге көмектеседі деп көзделген. Қатысушылардың тәжірибесі мен білімі азаматтық авиацияның қауіпсіздік жүйелерін жақсарту жөніндегі жұмысты жалғастыруға септесіп, әр елдегі сала мамандарын біріктіруге әсер етеді.