Биылғы жылдың 3 қарашасына қараған түні Қарағандыда Ленин атындағы шахтада болған апаттың себебі айтылды. Бес кенші қаза болған жарылысқа кінәлі 26 адам анықталған. Олардың арасында "Арселор Миттал Темиртау" комапниясының бас дирикторы Биджу Наир мен көмір департаментінің бастығы Джелсон Батиста да бар. Қазір шетелдік басшыларға тергеу аяқталғанша, елден шығуға тыйым салынды, деп хабарлайды КТК арнасына сілтеме жасаған kazlenta.kz
Арна мәліметінше, арнайы комиссия күдікті деп таныған адамдардың барлығы апат болған жерде газ жарылу қаупінің артқанын жасырып келген. КТК арнасының мәліметінше, апатқа шахтадағы жұмыстың тиісті деңгейде ұйымдастырылмағаны себеп болған. Яғни кеншілер газ мөлшерін анықтайтын құрылғылардың дұрыс жұмыс істемей тұрғанынан бейхабар болған. Сондықтан шахтаны газдан тазалау жұмысын алаңсыз жүргізген.
Бұрғылау кезінде құрылғы металл тіреуштің біріне тиіп, ұшқын пайда болып, соңы жарылысқа ұласқан. Кейінірек бұрғылау учаскесінде желдетілмей толып тұрған көмір шаңы да тұтанған. Компания мен шахта басшылары жарылыс болған жерде газ концентрациясы көп екенін бір апта бұрын білген. Бірақ жұмысты тоқтатпаған. "Апаттан бір апта бұрын ақ метан газының мөлшерден тыс тарағаны анықталды. Басшылық мұны жасырып келген. Тәртіп бойынша жұмыс тоқтап, дегазация және желдету болуы керек еді. Шахталарды газдан тазалау жұмысын жердің бетінен де жүргізу керек.
Үстінен бұрғылау арқылы жиналған газды шығару анағұрлым қауіпсіз. Бірақ ол жұмыс жүргізілмеген. Жер астындағы алақандай учаскеде бұрғылау кезінде қауіп деңгейі қашан да жоғары", - деді Қазақстан Республикасы төтенше жағдайлар министрі Юрий Ильин. Естеріңізге сала кетейік, Қарағанды облысындағы Ленин атындағы шахтада 3 қарашаға қараған түнде төтенше жағдай орын алып, салдарынан 4 адам қаза тапты. Кейін іздестіріліп жатқан тағы бір адамның денесі табылды. Сондай-ақ, апатқа байланысты мемлекет басшысы марқұмның туыстарына көңіл айтып, зардап шеккен азаматтардың тезірек сауығып кетуіне тілектестік білдірді.
24-11-2022, 15:09
Қарағанды облысында шахтада болған жарылыс не себепті болғаны анықталды
Егер мәтінде қате байқасаңыз, оны таңдап, Ctrl+Enter пернелерін басыңыз