Ақтөбе облысында жол апатынан екі адам көз жұмды, деп хабарлайды Polisia.kz.
Ағымдағы жылдың 18 қазаны сағат 20.00-де Әйтеке би ауданы Қарабұтақ кентінің маңындағы “Самара-Шымкент” автожолында адам өлімімен жол-көлік оқиғасы орын алды.
“ВАЗ-2115” автокөлігінің 30 жастағы жүргізушісі қозғалысқа кедергі мен қауіп туындаған кезде көлік құралының толық тоқтауына дейін жылдамдықты төмендетпей, жол-жөндеу жұмыстары жүргізілген учаскеге кіріп кетіп, осы учаскедегі қозғалысты реттеп отырған ЖШС-нің 49 жастағы қызметкерін қағып кеткен. Кейін автокөлік қарама-қарсы бағытта тұрған “FAW” маркалы автокөлікке соқтығысты.
Жол-көлік оқиғасы салдарынан “ВАЗ-2115” автокөлігінің жүргізушісі мен жолаушысы алған жарақаттарынан оқиға орнында көз жұмды. Екінші жолаушы мен ЖШС қызметкері Әйтеке би ауданының орталық аудандық ауруханасына жеткізілді.
Автожолдың осы учаскесінде жол-жөндеу жұмыстары жүргізілуде.
Аталған факт ҚР ҚК 345-бабы 4-бөлігі (Абайсызда екі немесе одан да көп адамның өліміне әкеп соққан жол қозғалысы ережелерін бұзу) бойынша сотқа дейінгі тергеп-тексерудің бірыңғай тізіліміне тіркелді.