Мәжілістің жалпы отырысында республикалық бюджет бойынша алдағы жылдарға арналған болжамдар айтылды. Толығырақ Үкімет басшысының орынбасары, Қаржы министрі Ерұлан Жамаубаев айтып берді, деп хабарлайды kazlenta.kz тілшісі Kazinform сайтына сілтеме жасап.
«Заң жобасы елдің 2028 жылға дейінгі әлеуметтік-экономикалық даму болжамы негізінде әзірленді. 2024 жылға арналған түсімдер 20,4 трлн теңгеге болжанып отыр. Трансферттерді есепке алмағанда, кірістің көлемі 16,1 трлн теңге немесе түсімдердің жалпы сомасының 80%. Келесі жылы Ұлттық қордан 3,6 трлн теңге көлемінде трансферт тарту жоспарлануда, оның ішінде нысаналы трансферт - 1,6 трлн теңге. Аталған қаражаттар әлеуметтік маңызы бар және стратегиялық инфрақұрылымдық жобаларды қаржыландыруға бағытталады», - деді Үкімет басшысының орынбасары, Қаржы министрі Ерұлан Жамаубаев Мәжілістің жалпы отырысында.
Сондай-ақ,министр республикалық бюджеттің шығысы бойынша жағдайды түсіндірді.
«Жалпы, бюджеттің 2024 жылға арналған шығыстары биылмен салыстырғанда 1,5 трлн теңгеге ұлғайып, шамамен 24 трлн теңгеге болжанып отыр. Бюджет тапшылығы жалпы ішкі өнімге 2,6%-ға болжанады. Дегенмен 2026 жылға қарай 2,3%-ке дейін біртіндеп төмендейді. Жалпы, республикалық бюджеттің басым бөлігі мемлекеттік және әлеуметтік міндеттемелерді толыққанды орындауға, өңірлерді дамытуға бағытталған», - дейді ол.
Бұған дейін Мәжіліс республикалық бюджет туралы заңды қабылданған болатын.